Ba Ober Rohani: Jang Kase Hilang Tu Harta Indah yang Tuhan So Titip pa Torang!

Minahasa, Ba,Ober News,- Ba ober sadiki soal Firman minggu ini dari 2 Timotius 1:3-18. Dp tema: Pelihara tu Harta Indah yang Tuhan so percayakan pa torang.

Paulus waktu itu ada di penjara di Roma, so tua, tinggal sandiri, banyak orang so tinggalkan pa dia. Mar dia kirim surat pa Timotius, dp anak rohani. Dia bilang begini: Pelihara tu harta indah itu, jaga bae-bae, deng pertolongan Roh Kudus yang tinggal di dalam torang.

Apa tu harta indah itu kang?

Satu, Injil yang ja kase slamat. Bukang karena torang bae, mar karena Tuhan pe kasih karunia. Tuhan Yesus so patahkan kuasa maut.

Dua, iman yang tulus dari keluarga. Paulus inga Timotius pe oma Lois deng pe mama Eunike yang ajar iman dari kacili. Sama deng torang orang GMIM, torang pe iman kuat karena oma, opa, mama, papa yang bawa pa kolom, bawa ba doa.

Tiga, karunia deng ajaran sehat. Tuhan so kase karunia pa torang masing-masing. Jang kase padam. Kobarkan ulang! Itu no tu tema pemuda GMIM tahun ini REKINDLE.

Kong di ayat 15 Paulus bilang ada orang model Figelus deng Hermogenes, waktu susah dorang lari, dorang berpaling. Mar ada juga Onesiforus, dia malah cari-cari Paulus di penjara, dia ja kase segar pa hati.

Jadi torang mau jadi sapa? Jadi Figelus yang lari waktu jemaat susah, atau jadi Onesiforus yang ja cari tu orang yang hilang, yang ja se segar pa pelayan laeng?

Jang jadi jemaat yang takut. Firman bilang, Tuhan nyanda kase roh ketakutan pa torang, mar roh yang kase kuat, roh yang kase kasih baku sayang, deng roh yang beking torang hidup tertib.

Torang GMIM tahun ini ada tema Kokoh dalam Iman, Unggul dalam Pelayanan. Mo kokoh bagimana kalu tu harta indah torang kase biar?

Mari jo pelihara di rumah, di kolom, di jemaat. Di rumah mulai ulang ba doa keluarga. Di kolom jaga tu ajaran sehat, jang cepat percaya tu ajaran aneh-aneh di sosmed. Di jemaat, jadi Onesiforus, jang hitung-hitungan ba layani.

Tuhan so titip tu harta indah pa torang, torang pe tugas jaga bae-bae! #moses#